អំណោយទាននៃការដេកលក់

នេះគឺជាពាក្យរបស់លោក ដេរេក ព្រីនស៍ ដែលបានដកស្រង់ពីព្រះបន្ទូលនៃព្រះសម្រាប់លោកអ្នក។

ទូល‌បង្គំនឹងសម្រាកកាយ‌ ហើយដេកលក់ទៅ‌ដោយសេចក្ដីស្ងប់ ត្បិតឱព្រះ‌យេហូវ៉ាអើយ‌មានតែទ្រង់ទេ‌ដែលប្រោសឲ្យទូល‌បង្គំនៅដោយសាន្ត‌ត្រាណបាន។ [ទំនុកតម្កើង ៤:៨]

សេចក្ដីពិតដ៏ស្រស់ស្អាតមួយដែលព្រះគម្ពីរបើកសម្ដែង គឺថា ការគេងជាអំណោយរបស់ព្រះសម្រាប់អ្នកដែលទ្រង់ស្រឡាញ់។ ដូច្នេះ ទោះបីដាវីឌកំពុងស្ថិតនៅកណ្ដាលសម្ពាធ សង្គ្រាម និងស្ថានការណ៍អាក្រក់ជាច្រើននៅជុំវិញគាត់ក៏ដោយ គាត់នៅតែអាចនិយាយថា៖ «ខ្ញុំនឹងដេក ហើយគេងដោយសុខសាន្ត»។ ហេតុអ្វី? ពីព្រោះសុវត្ថិភាពរបស់គាត់ពឹងផ្អែកលើ ព្រះអម្ចាស់ មិនមែនលើស្ថានភាព ឬកាលៈទេសៈ ហើយក៏មិនមែនលើពាក្យសន្យារបស់មនុស្សដែលអាចប្រែប្រួល ឬខកខាននោះដែរ។ ផ្ទុយទៅវិញ គាត់បានដាក់ទំនុកចិត្តលើ ព្រះបន្ទូល និងព្រះបន្ទូលសន្យាដ៏ស្ថិតស្ថេរ មិនចេះប្រែប្រួល និងអស់កល្បជានិច្ចរបស់ព្រះ។

ដាវីឌបាននិយាយថា៖ «ឱព្រះអម្ចាស់អើយ មានតែទ្រង់ប៉ុណ្ណោះដែលធ្វើឱ្យទូលបង្គំរស់នៅដោយសុវត្ថិភាព» គឺរស់នៅដោយមានសន្តិសុខ និងសេចក្ដីសុខសាន្ត។ ដូច្នេះ នៅពេលយប់មកដល់ ហើយដាវីឌចូលដេក គាត់ដឹងថា គាត់អាចគេងដោយសុខសាន្តបាន។ សព្វថ្ងៃ មានមនុស្សជាច្រើនដែលមិនមានទំនុកចិត្តដ៏មានព្រះពរនេះ។ ពេលយប់មកដល់ ពួកគេគេងមិនលក់ ប្រែខ្លួនទៅមក ពោរពេញដោយទុក្ខព្រួយ ការថប់បារម្ភ ការភ័យខ្លាច និងភាពច្របូកច្របល់។ កង្វល់ និងបន្ទុកពីពេលថ្ងៃនៅតែបន្តរំខានពួកគេរហូតដល់ពេលយប់។ ហេតុអ្វីមិនរៀនពីដាវីឌ? ចូរសម្រេចចិត្តថា សុវត្ថិភាព និងសេចក្ដីសុខសាន្តរបស់អ្នកស្ថិតនៅក្នុងព្រះ។ ទ្រង់អាចធ្វើឱ្យអ្នករស់នៅដោយសុវត្ថិភាព ដើម្បីឱ្យអ្នកអាចនិយាយថា៖ «ខ្ញុំនឹងដេកចុះ ហើយគេងដោយសុខសាន្ត»។ នេះជាដំណោះស្រាយដ៏មានព្រះពរសម្រាប់ការគេងមិនលក់។