ទីពឹងជ្រក

នេះគឺជាពាក្យរបស់លោក ដេរេក ព្រីនស៍ ដែលបានដកស្រង់ពីព្រះបន្ទូលនៃព្រះសម្រាប់លោកអ្នក។

«ខ្ញុំយកព្រះយេហូវ៉ាជាទីរឹងពឹង ធ្វើដូចម្តេចឲ្យអ្នកបាននិយាយនឹងខ្ញុំថា ចូររត់ទៅឯភ្នំរបស់ឯង ដូចជាសត្វហើរចុះ»។ [ទំនុកដំកើង ១១:១]

តើអ្វីជាទីជម្រករបស់អ្នក? តើអ្នកមានការរំខានចិត្ត នៅពេលមនុស្សដទៃប្រឆាំង ឬបង្កបញ្ហាដល់អ្នកឬ? តើអ្នកមានការព្រួយបារម្ភ នៅពេលអ្នកមើលឃើញភាពមិនប្រាកដប្រជានៃស្ថានភាពដែលយើងកំពុងរស់នៅសព្វថ្ងៃនេះឬ?

ព្រះយេស៊ូវបានមានព្រះបន្ទូលប្រាប់យើងថា នៅគ្រាចុងបញ្ចប់នៃយុគសម័យនេះ យើងនឹងឮអំពី សង្គ្រាម និងដំណឹងអំពីសង្គ្រាម។ មនុស្សនឹងភ័យខ្លាចយ៉ាងខ្លាំង ដោយសារតែការរំពឹងមើលអ្វីៗដែលនឹងកើតឡើងនៅលើផែនដី។ នៅក្នុងគ្រាបែបនេះ យើងត្រូវការទីជម្រកមួយ។ ដាវីឌបាននិយាយថា៖ «ខ្ញុំជ្រកកោនក្នុងព្រះអម្ចាស់»។

បន្ទាប់មក ដាវីឌបានឆ្លើយតបទៅកាន់អស់អ្នកដែលសង្ស័យថា តើព្រះអម្ចាស់ពិតជាទីជម្រកដ៏គ្រប់គ្រាន់ឬអត់។ គាត់បាននិយាយថា៖ «ហេតុអ្វីបានជាអ្នកនិយាយមកខ្ញុំថា៖ ‘ចូរហោះគេចទៅភ្នំរបស់អ្នក ដូចជាសត្វស្លាប’?»អត្ថន័យដែលដាវីឌចង់និយាយគឺ៖ «គ្មានភ្នំណាមួយដែលអាចផ្តល់ទីជម្រកដ៏ពិតប្រាកដដល់អ្នកបានទេ។ គ្មានទីជម្រកដែលមនុស្សបង្កើតឡើង ឬកន្លែងសុវត្ថិភាពណាមួយដែលមនុស្សរៀបចំឡើង អាចធានាការការពារដល់អ្នកបានឡើយ។ មានទីការពារតែមួយ និងទីជម្រកដ៏គ្រប់គ្រាន់តែមួយគត់ នោះគឺនៅក្នុងព្រះអម្ចាស់។»

«ខ្ញុំជ្រកកោនក្នុងព្រះអម្ចាស់»។ ខ្ញុំមិនពឹងផ្អែកតែលើជំនួយរបស់មនុស្ស ទ្រព្យសម្បត្តិខាងសម្ភារៈ ហិរញ្ញវត្ថុ ឬការផ្គត់ផ្គង់ផ្សេងៗ ដើម្បីធ្វើជាទីជម្រក និងសុវត្ថិភាពរបស់ខ្ញុំនោះទេ។ សុវត្ថិភាពពិតប្រាកដរបស់ខ្ញុំស្ថិតនៅក្នុងព្រះអម្ចាស់។

តើអ្នកធ្លាប់មានបទពិសោធន៍ថា ព្រះអម្ចាស់ជាទីជម្រករបស់អ្នក ដែរឬទេ? តើអ្នកដឹងថា ការជ្រកកោនក្នុងព្រះអម្ចាស់មានន័យយ៉ាងដូចម្តេចទេ? ខ្ញុំចង់លើកទឹកចិត្តអ្នកឱ្យ យកព្រះអម្ចាស់ជាទីជម្រករបស់អ្នក។