សុវត្ថិភាពពិតប្រាកដ

នេះគឺជាពាក្យរបស់លោក ដេរេក ព្រីនស៍ ដែលបានដកស្រង់ពីព្រះបន្ទូលនៃព្រះសម្រាប់លោកអ្នក។

ត្បិត ឱព្រះយេហូវ៉ាអើយ ទ្រង់នឹងប្រទានពរដល់មនុស្សសុចរិត ទ្រង់នឹងបាំងអ្នកទាំងនោះនៅជុំវិញ ដោយព្រះគុណ ទុកដូចជាខែល។ [ទំនុកដំកើង ៥:១២]

នេះហើយជារឿងមួយដែលប្រាកដណាស់ថា ព្រះអម្ចាស់ប្រទានពរដល់មនុស្សសុចរិត។ រឿងជាច្រើននៅថ្ងៃនេះដែលយើងធ្លាប់បានពឹងពាក់ យើងបានឃើញថា វាមិនមានភាពប្រាកដប្រជាទាំងស្រុងនោះទេ។ កន្លែងជាច្រើនដែលយើងបានស្វែងរកសន្តិសុខ និងភាពច្បាស់លាស់បានធ្វើឱ្យយើងបរាជ័យ និងធ្វើឱ្យយើងធ្លាក់ចុះ។ ដំណោះស្រាយនយោបាយ និងដំណោះស្រាយហិរញ្ញវត្ថុហាក់បីដូចជាកំពុងតែដួលរលំនៅពេលសព្វថ្ងៃនេះ។ ប៉ុន្តែមានរឿងមួយដែលនៅតែប្រាកដនៅក្នុងជីវិត គឺថា ព្រះអម្ចាស់ប្រទានពរដល់មនុស្សសុចរិត។

យើងត្រូវយកចិត្តទុកដាក់ឱ្យបានខ្លាំងជាងមុន ដើម្បីធានាថា ជីវិតរបស់យើងត្រឹមត្រូវនៅចំពោះព្រះ ហើយរស់នៅសមនឹងទទួលព្រះពរដែលព្រះអម្ចាស់បានរៀបចំទុកសម្រាប់មនុស្សសុចរិត។ បន្ទាប់មក អ្នកនិពន្ធទំនុកតម្កើងមានប្រសាសន៍ថា៖ «ទ្រង់ព័ទ្ធជុំវិញពួកគេ [មនុស្សសុចរិត] ដោយព្រះគុណរបស់ទ្រង់ ដូចជាខែល»។ ព្រះគុណរបស់ព្រះស្ថិតលើមនុស្សសុចរិត ហើយនៅពេលយើងដើរក្នុងសេចក្ដីសុចរិតរបស់ទ្រង់ ព្រះគុណរបស់ទ្រង់ប្រៀបដូចជាខែលដែលព័ទ្ធជុំវិញ និងការពារយើង។ ខែលនេះការពារយើងពីការវាយប្រហារក្នុងជីវិត ពីសម្ពាធ និងពីកម្លាំងដែលខ្លាំងលើសសមត្ថភាពរបស់យើង។ វាក៏ការពារយើងពីគ្រោះថ្នាក់ ភាពអន្តរាយ និងអំពើអាក្រក់ផងដែរ។

ជាព្រះពរដ៏អស្ចារ្យណាស់ ដែលបានដើរក្នុងព្រះគុណរបស់ព្រះអម្ចាស់ បានស្គាល់ព្រះវត្តមានរបស់ទ្រង់ និងដឹងថា ព្រះគុណរបស់ទ្រង់ព័ទ្ធជុំវិញយើងដូចជាខែលការពារ។ ចូរចងចាំថា មានរឿងមួយដែលប្រាកដ៖ ព្រះប្រទានពរដល់មនុស្សសុចរិត។