இச்சையடக்கம்

பரிசுத்த ஆவியின் கனியைப் பற்றி உங்களுடன் பகிர்ந்து கொண்டேன். நேற்றைய எனது பேச்சில், மென்மை அல்லது சாந்தம் என்ற கனியைக் கையாண்டேன். இன்று ஆவியின் கனியின் கடைசி வடிவமான இச்சையடக்கத்தின் கனியைப் பற்றி பேசப் போகிறேன். பெரும்பாலான நவீன பதிப்புகளில் கொடுக்கப்பட்ட மொழிபெயர்ப்பு இதுவாகும். கிங் ஜேம்ஸ் பதிப்பில், தன்னடக்கம் (நிதானம்) என்ற வார்த்தை பயன்படுத்தப்படுகிறது. “நிதானம்” என்ற வார்த்தையின் பிரச்சனை என்னவென்றால், 350 ஆண்டுகளுக்கும் மேலாக அது அதன் தொடர்புகளை ஓரளவு மாற்றியுள்ளது. இன்று சமகால ஆங்கிலத்தில், “நிதானம்” என்ற வார்த்தை பெரும்பாலும் மதுவிலக்குடன் மட்டுமே தொடர்புடையதாக இருக்கிறது. இருப்பினும், கிரேக்க வார்த்தையானது நம் வாழ்வின் ஒவ்வொரு பகுதியிலும் விலக்க வேண்டியதை உள்ளடக்கியது. இது மதுபானத்தில் அதிகப்படியான ஈடுபாட்டை தடைசெய்வது மட்டுமல்லாமல், உணவில் அதிகப்படியான ஈடுபாட்டை தடைசெய்வது; அதாவது பெருந்தீனி அல்லது அதிகமாக உண்பது போன்றவற்றையும் குறிக்கிறது.

நமது சமகால அமெரிக்க கலாச்சாரம் பற்றி யாரோ ஒருமுறை சொல்லக் கேட்டேன், “ஒரு அமெரிக்கர் ஒரு செட் பற்கள் தேய்ந்த பிறகு, தனக்கென ஒரு அகால புதைகுழியைத் தோண்டி, அவர் வேலையை முடிப்பதற்கு ஒரு செயற்கை செட்டைப் பெறுகிறார்.” பெருந்தீனி என்பது அமெரிக்க கிறிஸ்தவர்களிடையே பொதுவாக ஏற்றுக்கொள்ளப்பட்ட பாவங்களில் ஒன்றாகும் என்று நான் கூறுவேன். பெரும்பாலான அமெரிக்க தேவாலயங்கள், அல்லது குறைந்தபட்சம் பலர், மது மற்றும் குடிப்பழக்கத்திற்கு மிகவும் எதிராக இருக்கிறார்கள், ஆனால், பெருந்தீனிக்கு அல்லது அதிகம் சாப்பிடுவதற்கு எதிராக எதுவும் சொல்லவில்லை. அந்த தேவாலயத்தின் உறுப்பினர்களைப் பார்க்கும்போது, அவர்களின் உடல் நிலை அவர்கள் அதை ஒரு பாவமாக பார்க்கவில்லை என்பதை தெளிவாகக் காட்டுகிறது. இருப்பினும், பைபிள் பொதுவாக குடிப்பழக்கத்தையும் பெருந்தீனியையும் மிக நெருக்கமாக வைத்து, ஒவ்வொன்றையும் சமமாக கண்டிக்கிறது.

உதாரணமாக, சட்டத்தின்படி பெற்றோர்கள் பிடிவாதமும் கலகமும் கொண்ட மகனை எப்படி நடத்த வேண்டும் என்பது பற்றி உபாகமம் 21:18-21 இல் ஒரு உதாரணம் உள்ளது.

18 தன் தகப்பன் சொல்லையும் தன் தாயின் சொல்லையும் கேளாமலும், அவர்களால் தண்டிக்கப்பட்டும், அவர்களுக்குக் கீழ்ப்படியாமலும் போகிற அடங்காத துஷ்டப்பிள்ளை ஒருவனுக்கு இருந்தால், 19 அவன் தகப்பனும் அவன் தாயும் அவனைப் பிடித்து, அவன் இருக்கும் பட்டணத்தின் மூப்பரிடத்துக்கும் அவ்விடத்து வாசலுக்கும் அவனைக் கொண்டுபோய்: 20 எங்கள் மகனாகிய இவன் அடங்காத துஷ்டனாயிருக்கிறான்; எங்கள் சொல்லைக் கேளான்; பெருந்தீனிக்காரனும் குடியனுமாயிருக்கிறான் என்று பட்டணத்தின் மூப்பரோடே சொல்லுவார்களாக. 21 அப்பொழுது அவன் சாகும்படி அந்தப் பட்டணத்து மனிதரெல்லாரும் அவன்மேல் கல்லெறியக்கடவர்கள்; இப்படியே தீமையை உன் நடுவிலிருந்து விலக்கிப்போடவேண்டும்; இஸ்ரவேலர் எல்லாரும் அதைக் கேட்டுப் பயப்படுவார்கள்.

மகன் மீதான குற்றச்சாட்டைக் கவனியுங்கள். அவன் பிடிவாதமும், கலகக்காரனும், பெருந்தீனிக்காரனும் குடிகாரனுமாக இருந்தான். முதல் இரண்டும், பிடிவாதமும், கலகமும் குணத்தின் அம்சங்கள் மற்றும் காரணங்களாகும். கடைசி இரண்டு, அதுதான் பெருந்தீனி மற்றும் குடிப்பழக்கம் நடத்தையின் அம்சங்கள் மற்றும் முடிவுகளாகும். பெருந்தீனியும், குடிபழக்கமும் ஆகிய இரண்டும் மற்றும் ஏறக்குறைய அனைத்து வகையான அதீத ஈடுபாடு மற்றும் அடிமைத்தனமும் நமது குணாதிசயத்தில் இரண்டு வேர்களுக்குச் செல்கின்றன: பிடிவாதம் மற்றும் கலகத்தனம்.

இப்போது, மோசேயின் சட்டத்தின்படி, பெருந்தீனி மற்றும் குடிப்பழக்கம் ஆகிய இரண்டையும், அவர்கள் பிடிவாதத்திலும், கலகத்திலும் வெளிப்படுத்தும்போது, அதன் தண்டனை மரணமாகும். அந்த இரண்டு வகையான நடத்தைகளின் தேவனின் மதிப்பீடு அதுதான். எனவே, நாம் இன்று “நிதானம்” என்ற வார்த்தையைப் பயன்படுத்தப் போவதில்லை, ஆனால், “இச்சையடக்கம்” என்ற வார்த்தையை அதன் பரந்த தொடர்புகள் காரணமாகப் பயன்படுத்தப் போகிறோம்.

இப்போது, நாம் நம்மை கட்டுபடுத்த வேண்டும் என்று தேவன் எதிர்பார்க்கிறார் என்பதை அறிந்து பல கிறிஸ்தவர்கள் ஆச்சரியப்படுகிறார்கள். அந்த மாதிரியான போதனைகளுடன் அவர்களை நாம் எதிர்கொள்ளும்போது, அவர்கள் இப்படி பதில் சொல்கிறார்கள், “சரி, பரிசுத்த ஆவியானவர் நம்மைக் கட்டுப்படுத்த வேண்டும் என்று நினைத்தேன்.” ஆம், ஆனால் அது முழுமையான உண்மையல்ல. பரிசுத்த ஆவியானவர் நம்மைக் கட்டுப்படுத்துவார், ஆனால் நம் சொந்த விருப்பத்தின் ஒத்துழைப்பு இல்லாமல் முடியாது.” நாம் அதை இரண்டு இணையான அறிக்கைகளில் தொகுக்கலாம். பரிசுத்த ஆவியானவர் இல்லாமல், நம்மால் செய்ய முடியாது. நம்மை அல்லாமல் பரிசுத்த ஆவியானவர் செய்யமாட்டார். அதை மீண்டும் சொல்கிறேன். பரிசுத்த ஆவியானவர் இல்லாமல் நம்மால் செய்ய முடியாது. நம்மை அல்லாமல் பரிசுத்த ஆவியானவர் செய்யமாட்டார்.

இந்தக் கொள்கையை பிலிப்பியர் 2:12-13இல் பவுல் மிகத் தெளிவாக வெளிப்படுத்துகிறார்.

12 ….அதிக பயத்தோடும் நடுக்கத்தோடும் உங்கள் இரட்சிப்பு நிறைவேறப் பிரயாசப்படுங்கள். 13 ஏனெனில் தேவனே தம்முடைய தயவுள்ள சித்தத்தின்படி விருப்பத்தையும் செய்கையையும் உங்களில் உண்டாக்குகிறவராயிருக்கிறார்.

இரட்சிப்பின் முழு செயல்முறையும் தேவனிடமிருந்து தொடங்குகிறது. தேவன் நம்மில் வேலை செய்கிறார். சரியானதை விரும்புவதற்கும், சரியானதைச் செய்வதற்கும் அவர் நம்மில் செயல்படுகிறார். ஆனால், தேவன் நம்மில் வேலை செய்கிறதால், நாமும் செயல்பட வேண்டும் என்று அவர் சொல்கிறார். எனவே, நாம் வேலை செய்வோம், தேவனும் வேலை செய்கிறார். ஆனால் தேவன் நம்மில் எந்த அளவிற்கு வேலை செய்கிறார் என்பது நாம் எந்த அளவிற்கு வேலை செய்கிறோம் என்பதன் மூலம் கட்டுப்படுத்தப்படுகிறது. நாம் செயல்படுவதை நிறுத்தும்போது, தேவனுக்கு வேலை செய்ய இடமில்லை. எனவே, இரட்சிப்பின் முழு செயல்முறையும் இரண்டு அம்சங்களைக் கொண்டுள்ளது: தேவனின் செயல், நமது செயல். தேவன் உள்ளே செயல்படுகிறார், நாம் வெளியே செயல்படுகிறோம்.

இது குறிப்பாக, இச்சையடக்கத்தின் கனிக்கு பொருந்தும். நமது விருப்பப்படி செயல்படாமல், அது இயங்காது. கிறிஸ்தவ வாழ்க்கையில் இச்சையடக்கம் என்றால் என்ன என்பதை விளக்குவதற்கு பவுல் விரும்பும்போது, அவர் தடகளத் துறைக்கு திரும்புகிறார். 1 கொரிந்தியர் 9:24-27 இல் அவர் சொல்வது இதுதான்:

24 பந்தய சாலையில் ஓடுகிறவர்களெல்லாரும் ஓடுவார்கள்; ஆகிலும், ஒருவனே பந்தயத்தைப் பெறுவானென்று அறியீர்களா? நீங்கள் பெற்றுக்கொள்ளத்தக்கதாக ஓடுங்கள். 25 பந்தயத்திற்குப் [அதுதான், ஒலிம்பிக் போட்டிகள்] போராடுகிற யாவரும் எல்லாவற்றிலேயும் இச்சையடக்கமாயிருப்பார்கள். அவர்கள் அழிவுள்ள கிரீடத்தைப் பெறும்படிக்கு அப்படிச் செய்கிறார்கள், நாமோ அழிவில்லாத கிரீடத்தைப் பெறும்படிக்கு அப்படிச் செய்கிறோம்.

நிச்சயமாக, நமது நவீன ஒலிம்பிக் போட்டிகள், பவுல் காலத்தில் பண்டைய உலகில் நன்கு தெரிந்த ஒலிம்பிக் விளையாட்டுகளை அடிப்படையாகக் கொண்டவை. பண்டைய ஒலிம்பிக் போட்டிகளில் வெற்றியாளருக்கான பரிசு ஒரு லாரல் மாலை, நிச்சயமாக, விரைவில் வாடிப்போகும். அதனால் பவுல், அவர்கள் எல்லா பிரச்சனைகளுக்குள்ளும் செல்கிறார்கள், அனைத்து முயற்சிகளையும் மேற்கொள்கிறார்கள், வாடிப்போகும் ஒரு மாலையை பெறுவதற்காக என்று கூறுகிறார். ஆனால், நம்முடைய கிறிஸ்தவ முயற்சியில், அதற்கேற்ற செயல்பாட்டை மேற்கொண்டால், அதேபோன்ற இச்சையடக்கத்தை கடைப்பிடித்தால், வாடாத ஒரு மாலையை அல்லது பரிசைப் பெறுவோம் என்று அவர் கூறுகிறார். நிச்சயமாக, நவீன தடகளத்தில் பரிசு ஒரு தங்கப் பதக்கமாகும், ஆனால் ஒரு தங்கப் பதக்கம் கூட, அது நீண்ட காலம் நீடித்தாலும், இறுதியில் நிரந்தரமற்றது. எனவே, பவுலின் கருத்து என்னவென்றால், மிகவும் நிலையற்றதும், உள்ளார்ந்த முறையில் மிகவும் சிறிய மதிப்புள்ள ஒன்றிற்காகவும் அவர்கள் அதை செய்கிறார்கள், ஆனால் நாம் அதை நிரந்தரமான மற்றும் கணக்கிட முடியாத மதிப்பிற்குச் செய்கிறோம். அப்படியென்றால், அந்த மாதிரியான நோக்கத்திற்காக அவர்கள் அதை செய்தால், நம் வகையான நோக்கத்திற்காக அதை எவ்வளவு அதிகமாகச் செய்ய வேண்டும் என்று அவர் கூறுகிறார். பின்னர், அவர் அதை தனக்கு பயன்படுத்துகிறார். அவர் சொல்கிறார்:

26 ஆதலால் நான் நிச்சயமில்லாதவனாக ஓடேன் [நான் ஒரு குறிக்காக ஓடுகிறேன், அவர் கூறுகிறார்]; ஆகாயத்தை அடிக்கிறவனாகச் சிலம்பம் பண்ணேன். 27 மற்றவர்களுக்குப் பிரசங்கம் பண்ணுகிற நான்தானே ஆகாதவனாய்ப் போகாதபடிக்கு [அதாவது, நான் விதிகளை கடைபிடிக்காததால் பரிசை வெல்வதில் இருந்து விலக்கப்படுவது], என் சரீரத்தை ஒடுக்கிக் கீழ்ப்படுத்துகிறேன்.

பவுல் தனது வாழ்க்கையிலும் ஊழியத்திலும் சாதித்த அனைத்தையும் நாம் கருத்தில் கொள்ளும்போது, அது நிச்சயமாக நம்மை எச்சரித்து நம்மைத் தாழ்த்த வேண்டும், அவர் தனது சொந்த உடலின் கட்டுப்பாட்டை பராமரிக்காவிட்டால், அவர் இறுதியில் பரிசில் இருந்து தகுதி நீக்கம் செய்யப்படலாம் என்று அவர் அதை இன்னும் கருதினார்.

தடகளத்தின் உதாரணம், பவுலின் நாளில் இருந்ததைப் போலவே இன்றும் நமக்கு வலுவாகப் பொருந்தும். உண்மையில், தடகளம் மற்றும் உலக ஒலிம்பிக் மற்றும் பல, அவ்வப்போது அனைவரின் மனதிலும், அனைவரின் தொலைக்காட்சித் திரையிலும் இருக்கும்.

ஒரு நவீன விளையாட்டு வீரன் தனது போட்டியாளர்களை விட வேகமாக ஓடவோ, அல்லது உயரமாக குதிக்கவோ அல்லது குண்டெறிதல் செய்யவோ அல்லது ஈட்டி எறிதல் செய்வதோ போன்றவற்றை செய்து வெற்றி பெற வேண்டுமானால், அவன் எப்படிப்பட்ட வாழ்க்கையை நடத்த வேண்டும்? நான் இதைச் சொல்வேன்: ஒரு விளையாட்டு வீரனின் சுயஒழுக்கம் அவனது வாழ்க்கையின் ஒவ்வொரு முக்கிய பகுதியையும் பாதிக்கிறது. அவன் என்ன சாப்பிடுகிறான், என்ன குடிக்கிறான், அவன் தூங்கும் மணிநேரம், அவன் படிக்கும் விஷயங்கள் ஆகும். தடகளத்தில் வெற்றியின் பெரும்பகுதி சரியான உளவியல் கண்ணோட்டத்தைக் கொண்டிருப்பதாகும். இது அவனது நண்பர்களையும், கூட்டாளிகளையும் பாதிக்கிறது. அவன் தன்னை ஊக்குவிக்கும் நபர்களுடனும், ஒத்த மதிப்புள்ளவர்களிடமும் கலந்திருப்பான், அவனை திசைதிருப்பும் அல்லது அவனை இன்பங்களுக்கு தூண்டும் நபர்களுடன் அல்லது அவனது வெற்றிக்கான வாய்ப்புகளை தடுக்கும் இன்ப வடிவங்களோடு அல்ல.

இந்த கோட்பாடுகள் அனைத்தும் கிறிஸ்தவர்களாகிய நமக்குப் பொருந்தும். இச்சையடக்கம் நம் வாழ்வின் ஒவ்வொரு முக்கிய பகுதியையும் பாதிக்கிறது. நாம் என்ன சாப்பிடுகிறோம், என்ன குடிக்கிறோம், தூங்கும் மணிநேரம், நாம் படிக்கும் விஷயங்கள், நாம் பழகுபவர்கள்.

இப்போது, ஒரு விளையாட்டு வீரரின் வெற்றி இறுதியில் அவரது ஊக்கத்தைப் பொறுத்தது. அவர் அடைவதற்கு ஒரு குறிப்பிட்ட இலக்கு இருக்கிறது. அவர் இதுவரை யாரும் குதித்ததை விட சற்று ஒரு அங்குலமாவது உயரத்தில் குதிக்க விரும்புவார் அல்லது வேறு யாரரும் செய்யாததும் ஒரு குறிப்பிட்ட தூரத்தை விட சற்று வேகமாக செய்ய விரும்புவார். அதுதான் அவரது இலக்கு. அவரது இலக்குதான் அவரின் உந்துதல் ஆகும். அதுவே அவரது மிகக் கடுமையான பயிற்சிக்கு செல்ல உதவுகிறது.

கிறிஸ்தவர்களாகிய நமக்கும் இது பொருந்தும். நமக்கு சரியான இலக்கு இருந்தால், அது இச்சையடக்கத்தை கடைப்பிடிக்க உதவும். சரியான இலக்கு இல்லாவிட்டால், தோல்வியடைவோம். நமது இலக்கு என்னவாக இருக்க வேண்டும்? நான் இதற்கு பதிலளிப்பேன்: நம் வாழ்வுக்கான தேவனின் உயர்ந்த நோக்கத்தை நிறைவேற்றுவதற்கு, நம் வாழ்வின் ஒவ்வொரு பகுதியிலும் உள்ள ஒவ்வொரு ஆசிரியர்களும் ஒழுக்கமானவர்களாகவும், பயிற்றுவிக்கப்பட்டவர்களாகவும் இருக்க வேண்டும் என்பதே நமது குறிக்கோளாக இருக்க வேண்டும். இது பரலோகத்திற்கு செல்வதை காட்டிலும் அதிகமானது. இந்த நோக்கத்தை நமக்கு முன் வைத்தால், இச்சையடக்கம் வேண்டுகிற தேவையான தியாகங்களைச் செய்ய நாம் தயாராக இருப்போம்.

எல்லாம் சரி, இன்றைக்கு நம் நேரம் முடிந்துவிட்டது. திங்கள் முதல் வெள்ளி வரை இதே நேரத்தில் அடுத்த வாரம் உங்களுடன் மீண்டும் வருவேன். அடுத்த வாரம், மற்றொரு செழிப்பான அற்புதமான தலைப்பில் உங்களுடன் பகிர்ந்து கொள்கிறேன். வெற்றிகரமான வாழ்க்கைக்கான இன்னும் சில திறவுகோல்களை நான் உங்களுக்கு வழங்குகிறேன்.