புதிய சுயத்திற்கான தேவனுடைய திட்டம்

மற்றொரு வாரம் நெருங்கி வருகிறபொழுது மீண்டும் உங்களுடன் இருப்பது நல்லது. ஒன்றுக்கொன்று மிகவும் நெருக்கமாகவும், முற்றிலும் எதிராகவும் இருக்கிற இரண்டு இயல்புகள்: பழைய சுயம் மற்றும் புதிய சுயம் குறித்த நமது ஆய்வை தொடர்ந்து முடிப்போம்.

புதிய சுயத்தை எவ்வாறு வளர்ப்பது என்பதையும், இந்த புதிய நபரை நமக்குள் எவ்வாறு முதிர்ச்சியடைய செய்து தேவனுடைய நோக்கங்களை எப்படி நிறைவேற்றுவது என்பதையும் நேற்று உங்களுடன் பகிர்ந்து கொண்டேன். இயல்பால் நாம் என்னவாக இருந்தோம் (பழைய சுயம்) மற்றும் கிருபையால் நாம் என்னவாக மாற முடியும் (புதிய சுயம்) ஆகிய இரண்டு இயல்புகளைக் குறித்த உண்மையை பரிசுத்த ஆவியானவர் தேவனுடைய வார்த்தையின் கண்ணாடியில் நமக்குக் காட்ட அனுமதிப்பதன் மூலம் இந்த செயல்முறை தொடங்குகிறது. அதன்பிறகு, நாம் முறையாகவும், படிப்படியாகவும் பழைய சுயத்தின் கோரிக்கைகளை மறுத்து, அதற்கு பதிலாக, பரிசுத்த ஆவியானவரின் ஆளுகைக்கு அடிபணிய வேண்டும். இதன் விளைவு நம் நடத்தையில் ஒரே வார்த்தையான கீழ்ப்படிதலில் வெளிப்படுத்தப்படும்.

இன்று நான் புதிய மனிதனுக்கான தேவனுடைய திட்டத்தை, தேவன் புதிய மனிதனை உருவாக்கியதான நோக்கத்தை உங்களுடன் பகிர்ந்து கொள்ளப் போகிறேன். இதைப் புரிந்துகொள்வதற்கு, மனிதனுக்கான தேவனுடைய உண்மையான நோக்கத்திற்கு நாம் திரும்பிச் செல்ல வேண்டும். நாம் புரிந்துகொள்ள வேண்டியது என்னவென்றால், தேவன் ஒரு நோக்கத்தை உருவாக்கும்போது, அவர் அதை ஒருபோதும் கைவிடுவதில்லை! பாவமும் சாத்தானும் தேவனுடைய நோக்கத்தை தாமதப்படுத்தலாம், ஆனால் அவைகளால் அதை ஒருபோதும் முறியடிக்க முடியாது. எபேசியர் 1:12இல் பவுல் இதை மிகத் தெளிவாகக் கூறுகிறார், கிறிஸ்துவில் தேவனோடுள்ள நமது நிலையையும், உறவையும் பற்றி பேசுகிறார், அவர் சொல்கிறார்:

12 தமது சித்தத்தின் ஆலோசனைக்குத் தக்கதாக எல்லாவற்றையும் நடப்பிக்கிற அவருடைய தீர்மானத்தின்படியே, நாங்கள் முன்குறிக்கப்பட்டு, கிறிஸ்துவுக்குள் அவருடைய சுதந்தரமாகும்படி தெரிந்துகொள்ளப்பட்டோம்.

இது ஒரு நல்ல செய்தி, இல்லையா? அவருடைய சித்தத்தின் நோக்கத்திற்கு இணங்க எல்லாவற்றையும் செய்யும் தேவனுடைய திட்டத்திற்கு ஏற்ப நாம் இருக்கிறோம். கடைசியில், எல்லாம் தேவனுடைய நோக்கத்திற்கும், தேவனுடைய சித்தத்திற்கும் ஏற்ப நடக்கும். மனிதனைப் படைத்த தேவனுடைய உண்மையான நோக்கத்திற்கு இது பொருந்தும். பாவமும், சாத்தானும் அதைத் தாமதப்படுத்தினார்கள், ஆனால் அதை ஒருபோதும் தடுக்கமுடியாது! தேவன் காலத்தைப் பற்றி அதிக கவலைப்படுவதில்லை. தேவன் பொறுமையாக இருக்கிறார். அவர் பல ஆண்டுகள், பல நூற்றாண்டுகள், ஒருவேளை பல யுகங்கள் கூட எடுத்துக்கொள்வார், ஆனால், அவர் எப்பொழுதும் இறுதியில் தனது நோக்கத்தையும், திட்டத்தையும் நிறைவேற்றுவார்! எனவே, மனிதனுக்கான தேவனுடைய உண்மையான நோக்கத்தைப் பார்ப்போம். இது வேதத்தின் தொடக்கத்தில் ஆதியாகமம் 1:26இல் கூறப்பட்டுள்ளது:

26 பின்பு தேவன்: நமது சாயலாகவும் நமது ரூபத்தின்படியேயும் மனுஷனை உண்டாக்குவோமாக; அவர்கள் சமுத்திரத்தின் மச்சங்களையும், ஆகாயத்துப் பறவைகளையும், மிருகஜீவன்களையும், பூமியனைத்தையும், பூமியின் மேல் ஊரும் சகலப் பிராணிகளையும் ஆளக்கடவர்கள் என்றார்.

தேவன் மனிதனைப் பற்றி முதலில் ஒருமையிலும், பின்னர் பன்மையிலும் பேசுவதை நாம் கவனிக்கலாம். “மனிதனை உண்டாக்குவோம்” என்று கூறுகிறார், பின்னர், அவர் “அவர்கள் ஆளக்கடவர்கள்” என்று கூறுகிறார். வேறு வார்த்தைகளில் கூறுவதானால், அவர் ஒரு தனி மனிதனுக்காக அல்ல, முழு மனித இனத்திற்கான அவரது நோக்கத்தைப் பற்றி பேசுகிறார். தேவனுடைய இந்த வார்த்தைகளில் இரண்டு முக்கிய நோக்கங்கள் தெளிவாக வெளிப்படுத்தப்பட்டுள்ளன. முதலாவது, மனிதன் தேவனுடைய சாயலைக் காண்பிக்க வேண்டும். அவர் தேவனுடைய சாயலிலும், தேவனுடைய ரூபத்திலும் உருவாக்கப்பட்டார். ஆதியாகமத்தின் ஆரம்ப அதிகாரங்களில் கொடுக்கப்பட்ட படைப்பின் பதிவில், தேவன் மனிதனை ஆறாம் நாளில் படைத்தார், பின்னர் அவர் ஓய்வெடுத்தார். அவருக்கு ஏழாம் நாளில் ஓய்வு நாள் இருந்தது. இது தேவனுடைய மனதில் ஏதோ ஒன்றை வெளிப்படுத்துகிறது என்று நான் நம்புகிறேன். தேவன் தனது சொந்த சாயலை வெளிப்படுத்தும் வரை ஓய்வெடுக்க மாட்டார். படைப்பில் உள்ள மற்ற அனைத்தும் அந்த ஒரு உன்னத நோக்கத்தை உருவாக்குகின்றன: தேவன் தனது சொந்த சாயலை மீண்டும் உருவாக்க வேண்டும். புதிய படைப்பிலும் அதுவே உண்மை என்று நான் நம்புகிறேன். தேவன் தனது சொந்த சாயலை மீண்டும் உருவாக்கும் வரையில் ஓய்வெடுக்க மாட்டார்! ஆகவே, மனிதனுக்கான தேவனுடைய முதல் நோக்கம், தேவனுடைய சாயலைக் காண்பிப்பதுதான்.

இரண்டாவது நோக்கம் என்னவென்றால், தேவனுடைய அதிகாரத்தை அவர் சார்பாக பயன்படுத்துவதாகும். அவர் மனிதனைப் பற்றி, “அவர்கள் ஆளக்கடவர்கள்” என்று சொன்னார். மேலும், அவர், “பூமியனைத்தையும்” என்றார். மனிதன் தேவனால் நியமிக்கப்பட்ட ஆட்சியாளராக இருக்க வேண்டும், பூமியனைத்தின் மேலும் தேவனுடைய அதிகாரத்தைப் பயன்படுத்த வேண்டும். இப்போது, மனிதனின் பாவம் தேவனுடைய இந்த இரண்டு நோக்கங்களையும் விரக்தியடையச் செய்தது. முதலாவதாக, மனிதனில் தேவனுடைய சாயல் பாவத்தால் சிதைக்கப்பட்டது. இரண்டாவதாக, ஆட்சி செய்பவனாக இருக்க வேண்டிய மனிதன், பாவத்திற்கும், சாத்தானுக்கும் அடிமையாக மாறினான். அவன் தனது பாவத்தின் காரணமாக ஆட்சி செய்யும் நிலையிலிருந்து அடிமை நிலைக்கு வீழ்ந்தான்.

ஆனால், 1 கொரிந்தியர் 15:45இல், இயேசு “பிந்தின ஆதாம்” என்று அழைக்கப்படுகிறார். ஆதாமின் படைப்பின் உண்மையான நோக்கத்திற்கு, அவர் வந்ததன் நோக்கத்தை இது நேரடியாக தொடர்புபடுத்துகிறது. முந்தின ஆதாமிய இனத்திலிருந்த பாவம் மற்றும் கேட்டின் தீய சுதந்தரத்தை முற்றிலுமாக மூடவும், முடிவுக்குக் கொண்டுவரவும், பின்னர், ஆதாமின் கீழ்ப்படியாமையால் விரக்தியடைந்த தேவனுடைய இரண்டு நோக்கங்களை நிறைவேற்றவும் இயேசு “பிந்தின ஆதாமாக” வந்தார். அந்த இரண்டு நோக்கங்கள்: தேவனுடைய சாயலைக் காண்பிப்பதும், தேவனுடைய அதிகாரத்தைப் பயன்படுத்துவதுமாகும். தேவனுடைய சாயலைக் காண்பிப்பது பற்றி, யோவான் 14:9இல் இயேசு தன்னைப் பற்றி கூறுகிறார்:

“என்னைக் கண்டவன் பிதாவைக் கண்டான்...”

வேறு வார்த்தைகளில் கூறுவதானால், அவர் தேவனுடைய சாயலை முழுமையாக வெளிப்படுத்தினார். தேவனுடைய அதிகாரத்தைப் பயன்படுத்துவதைப் பற்றி, இயேசு யோவான் 14:10இல் கூறினார்:

“நான் பிதாவிலும், பிதா என்னிலும் இருக்கிறதை நீ விசுவாசிக்கிறதில்லையா? நான் உங்களுடனே சொல்லுகிற வசனங்களை என் சுயமாய்ச் சொல்லவில்லை; என்னிடத்தில் வாசமாயிருக்கிற பிதாவானவரே இந்தக் கிரியைகளைச் செய்துவருகிறார்.”

அதாவது, இயேசுவின் கிரியைகளின் வார்த்தைகள் பிதாவிடமிருந்து அதிகாரத்தைப் பெற்றது, அது இயேசுவின் மூலம் பேசி, செயல்படுகிறது. இயேசு பிதாவின் சாயலை மிகச்சரியாக வெளிப்படுத்தினார். அவர் பிதாவின் சார்பாக அவரது அதிகாரத்தை பரிபூரணமாக பயன்படுத்தினார், இதனால் ஆதாம் முன்பு உருவாக்கப்பட்ட இரண்டு நோக்கங்களை நிறைவேற்றுகிறார், ஆனால் அவனது பாவத்தின் காரணமாக அதை நிறைவேற்றத் தவறினான்.

அவர் தம்முடைய மரணம் மற்றும் உயிர்த்தெழுதலுக்குப் பிறகு, இயேசு தாம் பிதாவுக்குச் செய்ததைப் போலவே தம்முடைய சீஷர்களும் செய்ய வேண்டுமென்று அவர்களுக்கு கட்டளையிட்டார். யோவான் 20:21இல், உயிர்த்தெழுந்த ஞாயிறு மாலையில் சீஷர்கள் ஒரு கூட்டமாக இருந்தபோது, அவர்களுக்கு முன்பாக தோன்றி இவ்வாறு சொன்னார்:

“உங்களுக்குச் சமாதானம் உண்டாவதாக; பிதா என்னை அனுப்பினதுபோல நானும் உங்களை அனுப்புகிறேன்.”

அவை மிகவும் முக்கியமான வார்த்தைகள். “பிதா என்னை அனுப்பினதுபோல நானும் உங்களை அனுப்புகிறேன்.” பிதா இயேசுவை அனுப்பினதுபோலவே, இயேசுவும் தம் சீஷர்களை அனுப்புகிறார்.

பிதா இயேசுவை எந்த நோக்கத்திற்காக அனுப்பினார்? ஆதாமின் வீழ்ச்சியின் மூலம் விரக்தியடைந்த நோக்கங்களை நிறைவேற்றவும், தேவனுடைய சாயலைக் காண்பிக்கவும், தேவனுடைய அதிகாரத்தைப் பயன்படுத்தவும். இயேசு அதைச் செய்தார், இப்போது, அதையொட்டி, தமக்காக, அவரது சாயலை மீண்டும் உருவாக்கவும், அவரது அதிகாரத்தைப் பயன்படுத்தவும் அவர் தம்முடைய சீஷர்களை அவ்வாறே செய்யும்படி கட்டளையிடுகிறார். ஆதாமின் கீழ்ப்படியாமையின் மூலம் விரக்தியடைந்த நோக்கத்தை நிறைவேற்ற புதிய மனிதனுக்கான தேவனுடைய நோக்கம் அதுவே.

கிறிஸ்துவின் சாயலை மீண்டும் உருவாக்குவதற்கான நமது பொறுப்பைப் பார்ப்போம். ரோமர் 8:29இல், பவுல் இவ்வாறு கூறுகிறார்:

29 தம்முடைய குமாரன் அநேக சகோதரருக்குள்ளே முதற்பேறானவராயிருக்கும்பொருட்டு, தேவன் எவர்களை முன்னறிந்தாரோ அவர்களைத் தமது குமாரனுடைய சாயலுக்கு ஒப்பாயிருப்பதற்கு முன்குறித்திருக்கிறார்.

புதிய மனிதனுக்கான தேவனுடைய நோக்கம், தேவனுடைய விதி பற்றிய ஒரு வார்த்தை இருக்கிறது. தம்முடைய குமாரனாகிய இயேசு அநேக சகோதரருக்குள்ளே முதற்பேறானவராயிருக்கும்பொருட்டு, தமது குமாரனுடைய சாயலுக்கு ஒப்பாயிருப்பதற்கு முன்குறித்திருக்கிறார். பல பிள்ளைகளை பெறவேண்டும் என்பதே தேவனுடைய நோக்கமாக இருந்தது. தேவனுடைய பிள்ளைகள் அனைவரும். ஆனால், அனைத்து பிள்ளைகளும் தேவனுடைய மூத்த குமாரன், அவருடைய மூத்த மகன், அவருடைய ஒரே பேறான இயேசுவின் சாயலை மீண்டும் உருவாக்குகிறார்கள். எனவே, புதிய படைப்பில், புதிய சுயத்தில் அதுவே நமது முதல் பொறுப்பாகும்: தேவனுடைய குமாரனின் ரூபத்தை மீண்டும் உருவாக்குவது, தேவனுடைய சாயலை மீண்டும் உருவாக்குவதாகும்.

நம்முடைய இரண்டாவது பொறுப்பு கிறிஸ்துவின் அதிகாரத்தை அவர் சார்பாகப் பயன்படுத்துவதாகும். மத்தேயு 28:18-20இல், மீண்டும் உயிர்த்தெழுந்த பிறகு, இயேசு தம் சீஷர்களிடம் கூறினார்:

18 வானத்திலும், பூமியிலும் சகல அதிகாரமும் எனக்குக் கொடுக்கப்பட்டிருக்கிறது. 19 ஆகையால் நீங்கள் புறப்பட்டுப்போய், சகல ஜாதிகளையும் சீஷராக்கி….

“ஆகையால்” என்ற வார்த்தையை நாம் பார்க்க வேண்டும். “அதிகாரம் எனக்கு கொடுக்கப்பட்டுள்ளது, ஆனால் அந்த அதிகாரத்தை என்னுடைய பிரதிநிதியாக என் சார்பாகப் பயன்படுத்த உங்களை அனுப்புகிறேன்,” என்று இயேசு சொல்கிறார். ஆகவே, சகல ஜாதிகளையும் சீஷராக்குவதில், கிறிஸ்துவின் அதிகாரத்தை அவர் சார்பாக செயல்படுத்துவதே நமது பொறுப்பாகும். மேலும், இது இயேசு நாம் செய்யும்படி சொல்லியிருக்கிற இரண்டு காரியங்களில் வெளிப்படுத்தப்படுகிறது: “பிதா, குமாரன், பரிசுத்த ஆவியானவரின் நாமத்தில் அவர்களுக்கு ஞானஸ்நானம் கொடுப்பது.” வேறு வார்த்தைகளில் கூறுவதானால், நாம் திரியேக தேவனுடைய நாமத்தைப் பயன்படுத்தும்போது, நாம் செய்யும் அனைத்திற்கும் பின்னால் திரியேக தேவனுடைய அதிகாரம் இருப்பதை இது குறிக்கிறது. பின்னர், “நான் உங்களுக்குக் கட்டளையிட்ட அனைத்தையும் கடைப்பிடிக்க அவர்களுக்கு போதிப்பது” என்றார். நம்முடைய போதனை இயேசு கிறிஸ்துவின் அதிகாரத்தின் வெளிப்பாடாகும். நாம் விரும்பும் எதையும் கற்பிக்க நாம் நியமிக்கப்படவில்லை, ஆனால், இயேசு தம்முடைய முதல் சீஷர்களுக்கு கற்பித்ததையே நாம் கற்பிக்க கட்டளையிடப்பட்டிருக்கிறோம், இந்த செயல்முறை, யுகத்தின் இறுதிவரை செல்ல வேண்டும், அங்கு இயேசு கூறுகிறார், “இதோ, உலகத்தின் முடிவுபரியந்தம் சகல நாட்களிலும் நான் உங்களுடனேகூட இருக்கிறேன்.”

நான் முடிப்பதற்கு முன், இன்னும் ஒரு முக்கியமான உண்மையை உங்கள் கவனத்திற்குக் கொண்டுவர வேண்டும், புதிய சுயத்திற்கான இந்த இரண்டு நோக்கங்களையும் எந்தவொரு தனிப்பட்ட விசுவாசியாலும் முழுமையாக நிறைவேற்ற முடியாது, ஆனால் கூட்டான புதிய மனிதர்கள் தேவை. எபேசியர் 2:14-15இல், பவுல் கூறுகிறார்:

14 எப்படியெனில், அவரே [அவர்தான் இயேசு] நம்முடைய சமாதான காரணராகி, இருதிறத்தாரையும் [அது யூதர்களும் புறஜாதிகளும்] ஒன்றாக்கி, பகையாக நின்ற பிரிவினையாகிய நடுச்சுவரைத் தகர்த்து, 15 சட்டதிட்டங்களாகிய நியாயப்பிரமாணத்தைத் தம்முடைய மாம்சத்தினாலே ஒழித்து, இருதிறத்தாரையும் தமக்குள்ளாக ஒரே புதிய மனுஷனாகச் சிருஷ்டித்து, இப்படிச் சமாதானம் பண்ணி,

எனவே, புதிய மனிதன் என்பவன் கூட்டாக இருக்கும் புதிய மனிதன் ஆவான், அது தேவனுடைய அனைத்து பிள்ளைகளையும் உள்ளடக்குகிறது, மேலும், இந்த புதிய மனிதன் ஒரு கூட்டாக, இணைக்கப்பட்ட அமைப்பின் மூலமாக செயல்படுகிறான்.

விசுவாசிகளாக இயேசுவோடு நமக்குள்ள உறவைப் பற்றி பவுல் எபேசியர் 4:16இல் கூறுகிறார்:

16 அவராலே சரீரம் முழுதும், அதற்கு உதவியாயிருக்கிற சகல கணுக்களினாலும் இசையாய்க் கூட்டி இணைக்கப்பட்டு, ஒவ்வொரு அவயவமும் தன்தன் அளவுக்குத் தக்கதாய்க் கிரியைசெய்கிறபடியே, அது அன்பினாலே தனக்குப் பக்திவிருத்தி உண்டாக்குகிறதற்கேதுவாகச் சரீரவளர்ச்சியை உண்டாக்குகிறது.

எனவே, நாம் ஒரு புதிய ஒன்றுப்பட்ட மனிதனை வெளிப்படுத்தும் ஒரு முழுமையான இணைக்கப்பட்ட அமைப்பாக இருக்க வேண்டும். இந்த புதிய மனிதன் கிறிஸ்துவின் பூமிக்குரிய ஊழியத்தை மறுவடிவமைக்கிறான், இந்த வகையில் தேவனுடைய இரண்டு நோக்கங்களையும் நிறைவேற்றுகிறான்: அவன் தேவனை உலகிற்கு காண்பிக்கிறான், மேலும், அவர் சார்பாக தேவனுடைய அதிகாரத்தைப் பயன்படுத்துகிறான்.

இன்றைக்கு நமது நேரம் முடிந்துவிட்டது. திங்கள் முதல் வெள்ளி வரை இதே நேரத்தில் அடுத்த வாரம் உங்களுடன் மீண்டும் வருவேன். அடுத்த வாரம் நான் ஒரு புதிய அற்புதமான தலைப்புக்குச் செல்கிறேன், மேலும், ஒருமுறை நீங்கள் என்னுடன் இருப்பதற்காக ஆவலுடன் காத்திருக்கிறேன்.

சில முக்கிய அறிவிப்புகளுக்கு இப்போது காத்திருங்கள். குறிப்பாக, அது எனது சுய ஆய்வு வேதப் பாடநெறியை (செல்ஃப் ஸ்டடி பைபிள் கோர்ஸ்) நீங்கள் எவ்வாறு பெறலாம் என்பதற்கான அறிவிப்பாகும். இது வேத படிப்பின் ஒரு முழுமையான பாடமாகும், அதை நீங்கள் முழுவதுமாக சொந்தமாக படிக்கலாம். இது விளக்கக் குறிப்புகள், சரியான பதில்கள் மற்றும் ஒருங்கிணைந்த நினைவக வேலைபாடம் ஆகியவற்றை உள்ளடக்கியது. இந்த சுய ஆய்வு வேதப் பாடநெறியை (செல்ஃப் ஸ்டடி பைபிள் கோர்ஸ்) நீங்கள் எவ்வாறு பெறலாம் என்பதை பின்வரும் அறிவிப்பு உங்களுக்குத் தெரிவிக்கும்.