Wadatar Sa

Ayoyin Littafi Mai Tsarki da yawa suna goyon bayan gaskiyar cewa Yesu ya ɗauki la'anar talaucin mu. Bari mu dubi wurare biyu na musamman, mu fara da 2 Korintiyawa 8:9:

"Domin kun san alherin Ubangijinmu Yesu Kristi, ko da yake shi mawadaci ne, sai ya zama matalauci sabili da ku, domin ta wurin talaucinsa ku wadata"

Na kan yi amfani da ƙarshen wannan ayar a matsayin "don mu iya zama mawadata"! Amma Ruhu Mai Tsarki ya nuna mani cewa tana nufin "za mu iya zama mawadata ." Za mu iya zamantowa mawadata sannan mu sake zama matalauta, amma mu " zama" mawadata na nuna na har abada. Yesu ya ɗauki muguntar - talauci - domin mu sami kyakkyawar - wadata. Yesu ya ɗauki talaucin mu domin mu sami wadatar Sa.

Waɗansu mutane na ɗaukar cewa Yesu matalauci ne a dukan rayuwar Sa a duniya a lokacin hidimarsa, amma ba zan iya amincewa da wannan ra'ayin a matsayin gaskiya ba. Ya kamata mu bambanta tsakanin wadata da dukiya. Yesu ba mai dukiya ba ne a kan tunanin cewa yana da babban asusun banki ko dukiya mai yawa ba, amma hakika yana da wadata. Duk mutumin da zai iya ba taron mutane dubu biyar abinci (da mata da yara) ba talaka ba ne! A gaskiya, Yesu ya sami ragowar abinci bayan ya ciyar da mutane kusan dubu goma sha biyu fiye da lokacin da ya fara (dubi Matta 14:15-21). Wannan kyakkyawan hoton wadata ne!

Bugu da ƙari, Yesu ya bada wannan wadata ga almajiransa. Lokacin da ya aike su yin wa’azin bishara, ya gaya musu kada su ɗauki wani abu tare da su. Duk da haka, shaidarsu daga baya ita ce ba su rasa komai ba. (dubi Luka 22:35). Wannan ba talauci ba ne!

Yesu bai taɓa shiga damuwa ko ruɗani ba. A natse yake kuma yana da cikakken iko a kan kowane irin yanayi. Bai taɓa shakkar cewa alherin Uban Sa ba zai samar masa da duk abin da yake buƙata ba. Uban kuma bai taɓa gazawa ba.